شهيوات بيتزا تركية بالخطوات المصورة

السلام عليكم احبائي  و مرحبا بكم على موقع الشهيوات و الحلويات موقع لالة سناء لكل ما يخص المرأة العربية

مكونات و طريقة عمل بيتزا تركية بالخطوات المصورة

مقادير عجين بيتزا تركية

200 غرام سميدة رقيقة 

150 غرام دقيق الفورص 

نص معلقة زيت الزيتون (سمحوليا ماصورتش الزيت)

10غرام سكر سنيدة 

معلقة خميرة العجين 

50 غرام زبدة بحرارة الغرفة 

1/8 لتر لبن (يعني النص ديال ربع لتر )

قبصو الملح 

طريقة تحضير بيتزا تركية

نخلط الدقيق والسميدة والملح والسكر والزبدة ونخدموهم مزيان بحال الى بغينا نصايبو العجينة المكسرة نحدموهم مزيان بايدينا من بعد نزيدو الخميرة اللي نديروها فالماس دافي تطلق عاد نخويوها على العجين وفالاخير نمعوها باللبن يمكن نديرو الكمية كلها ويمكن نقصو على حسب الدقيق يعني نخويو شوية بشوية غير تجمع نحبسو راه غادي تجي رطبة ندلكوها شوية من بعد نغطيوها خلوها حتى تخمر

من بعد ماتحمر نقصموها كويرات صغار انا خرجلي 8 ديال الكويرات

مقادير حشوة بيتزا تركية

صلصة البيتزا مع بعض الاضافات (مطيشة محكوكة/مطيشة الحك/ثوم/زعتر/ملح/ابزار/زيت الزيتون/كمون)

كفتة مشحرة 

صدر الدجاج مشحر 

جبن الموتزريلا 

جبن محكوك 

الفلفة حارة (اختيارية ) ولكن راه جات بنييييييييييييييينة معاهم انا درتها غير فوق واحد منهم ديالي ههههههههههههههه

بصلة مشحرة فزيت مع ملح وابزار من بعد نقسموها شوية مع الدجاج وشوية مع الكفتة

دابا نبداو الطريقة نسرحو العجينة ونديرو فيها الصلصة من بعد احدى الحشوات من بعد الجبن من بعد نجمعو الجناب حتى نشكلو باطو نخليكم مع الصور

من بعد مانستفوهم فالصينية ديال الفران نخطلو البيض مع الملح والابزار وندهنو بيه الخبيزات ونخويو البيض فوق منهم وندردو الزعتر والى الفرن وبالصحة والراحة سمحوليا هادو اللي صورت مافيهمش الفرماج حيت عندي فالدار شي وحدين ماتايكلوش الفرماج بديت بديالهم غي بالكفتة