الماسك الصحراوي لتبييض الجسم والوجه والمنطقة الحساسة

كاتبة الوصفة زوجي حبيبي تقول : اليوم على موقع لالة سناء جبت ليكم واحد الوصفة جربتها على راسي هو الاول قبل ما نحطها ليكم 

تصورو تصدمت بالنتيجة الرائعة اللي حصلت عليها عرفتو علاش  عندي شي رجيلات حآآآآلتهم رجلين راجلي ابيض منهم ههههه ولكن دابا فاش كنلبس صنيديلة وكنخرج كيبانو لي رجيلاتي كيشعلو 

وحاجة اخرى جات لعدنا اختي واحد المرة وقالتلي لحمك ولا بيآآآض اش درتي ليه المهم غادي نعطيكم الوصفة ونوريكم كيفاش تستعملوها بالنسبة للجسم والوجه والمنطقة الحساسة

مكونات الماسك الصحراوي لتبييض الجسم والوجه والمنطقة الحساسة

غادي نحتاجو نص لتر حليب

صابونة دوف البيضاء

باكية الغاسول الابيض الزوين راه عند العطار

نصف قنينة ماء ورد 

ماء الاوكسجين (الديكاباج نمرة 6)

طريقة عمل الماسك الصحراوي لتبييض الجسم والوجه والمنطقة الحساسة

كتفيضي الحليب وحدو وتحيديه من فوق العافية وكتزيدي عليه الصابونة من بعد ما حكيتيها في الحكاكة وكتخلطي مزيآآن ثم كتضيفي ماء الورد والغاسول الابيض وكتحركيهم مزيان يمكن ليك ديريهم في مولينكس باش ينساجمو انا ما درتهمش ههههه خلطت غي بالملعقة

من بعد ملي يبرد كديريه في شي بواطة كتسد وكديريه في الثلاجة

غادي تلاحظي انو كيبان سائل ولكن النهار التالي غادا تلاحظيه ولا بحال الكريم  هادي الصورة ديالو

شوفوه كيكايبان ملي هزيتو بالمعلقة

نجيو دابا لطريقة استعمال الماسك الصحراوي لتبييض الجسم والوجه والمنطقة الحساسة

بالنسبة للجسم : 

كناخدو الكمية اللي غادي نستعملو تقريبا 2 او 3معالق من الخليط ونرجعو البواطة مباشرة للثلاجة باش تبقا عندا مدة طويلة وما تخسرش
المهم نشدو هاد الكريما ونزيدوها ماء الاوكسجين نمرة6 غي القياس تقريبا نصف ملعقة صغيرة واذا خفتو منو ممكن تستغناو عليه
انا استعملتو في الاول ودابا ما كنستعملوش
كتخلطي هاد الخليط وكتدهني لحمك كآآآآمل باستتناء المنطقة الحساسة والوجه لانو فيها الماء ديال الاوكسجين من الاحسن نبعدوهم عليهم
اما اذا ما كنتوش عاملينو كتدهنو بيه كلشي الجسم
وكتخلوه مدة 3سوايع على الاقل انا كنديرو بالليل ومع الصباح كندوش
كتديري الوصفة يوميا على الاقل واحد الاسبوع متابع (انا ما كملتش اسبوع معكازة هههه) ومن بعد وقتما رشق ليك كتديريه ههههه اما 2 او 3مرات في الاسبوع لانو كيبقا عندك بزاف الخليط

بالنسبة للمنطقة الحساسة :

كما قلت كتستعملي الوصفة دون اضافة الاوكسجين وراه غتبهري بالنتيجة انا تصدمت اول مرة نشوف المنطقة بياضت ليا هههههه بعد ما كانت زرقآآآا(كنت بديت واحد الوصفة لكن وقفتها واستعملت هادي) كديريها بالليل وفي الصباح غسلي عادي بالصابون الخاص او ديري بحالي الخزامى مع الماء سخون (كديريها في ماء طايب وتخليها تطلق فيه بما دفا شويا وكتصفيه وكتسنجاي بيه) وبطيبيعة الحال ضرووووووري تبقاي تمسحي المنطقة بفوطة كلما غسلتي باش ما تبقاش فيها الرطوبة
بالنسبة للوجه

كتعملي الوصفة وبطيبعة الحال بلا اوكسجين وكتخليها حتى تنشف وكتغسلي وجهك

اذا كان وجهك جاف استعملي موراها الكريم المرطب الخاص بيك

استعملي الوصفة على وجهك 2 حتى 3 مرات بالاسبوع

نتمنى تجربوها وغادي تلاحضو الفرق والله خصوصا للعريسات اللي كيقلبو على تبريمات او المتزوجات اللي بغاو يبهرو ازواجهم ههههه
وحتى العازبات علاش لا

ملاحظة هامة : ما تخلطيش الاكسجين مع الخلطة مباشرة حتى تبغي تستعمل الوصفة عاد ديري

كاتبة الوصفة زوجي حبيبي تقول : في الاخير دعيو معايا شي دعيوة الخير ودعيو معايا ربي يجمع شملي براجلي عن قريب